Ubang politiko pabor kung wa’y partido

CEBU, Philippines – Samtang kadaghanan sa mga kandidato magkapuliki pagpasakop og partido panahon sa eleksiyon, apan alang sa uban mas sayon ang mag-independente.

Kini ang sitwasyon nila’ng Bokal Alex Binghay nga gikan sa One Cebu Party ug kanhi bokal Ma. Victoria “Tata” Corominas sa Liberal Party apan nipili nga mag-independente sa umaabot eleksiyon.

Si Binghay magpasubli sa ikatulo ug katapusang termino samtang si Corominas buot usab mobalik sa kanhi gikuptan niya nga posisyon sa ikatulo’ng distrito.

“I’m running as independent karon aron I will only be answerable to the people,” matud ni Corominas.

Si Corominas nisunod sa lakang sa iya’ng namatay nga amahan nga si kanhi bokal Andres Corominas kinsa nahimo’ng sakop sa hunta probinsiyal sa Sugbo ubos sa Partido Promdi niadto’ng 1998 ug nasublian sa 2001 apan namatay sa 2002. Si Tata napili isip bokal sa 2004 nga independente, nasublian sa 2007 ubos sa Lakas Christian-Muslim Democrats apan napilde sa 2010 diin siya sakop sa LP.

Samtang si Binghay giingong maikog sa kampo ni Gobernador Hilario Davide III sa LP hinungdan sa pagdagan niini og independente. – /EIM) (BANAT NEWS)