Carwash gidili sa sidewalk
CEBU, Philippines – Ang kagamhanan sa dakbayan sa Mandaue midili sa mga carwash operator sa paggamit sa aseras ug mga karsada sa ilang mga negosyo aron dili mahasol ang mga tawo nga moagi.
Ang mga carwash operator giawhag na usab nga mokuha og permit sa ilang negosyo ug rebokahon kini kun sila molapas sa lagda nga nagdili nga gamiton ang karsada sa ilang patigayon.
Gipasar na sa Mandaue City Council ang ordinansa ug nagpaabot na lang sa pirma ni Mandaue City Mayor Jonas Cortes aron hingpit na nga ikapatuman 15 ka adlaw human kini ikapublikar sa mantalaan.
Lakip sa lagda diha sa ordinansa nga ang modumala og carwash adunay luna nga alang sa tulo ka sakyanan aron nga dili kini makagamit sa karsada.
Si Konsehal Jimmy Ceniza nga maoy misugyot sa ordinansa mipasabot nga ang mga sakop sa Traffic Enforcement Agency of Mandaue (TEAM) ug ang Mandaue City Police Office kinahanglang motan-aw kun gituman ba ang lagda sa mga carwash operator.
Kun hingpit na kini nga ipatuman, napanglantawan nga ang mga carwash nga nag-operate sa karsada ug nakahasol sa publiko mawagtang na.
Samtang ang molapas niining maong lagda hatagan lang og warning sa unang higayon, unya P3 mil nga multa sa ikaduhang kalapasan ug P5 mil apil ang pagkanselar sa business permit sa ikatulong kalapasan. – /RUB) (BANAT NEWS)
- Latest
