Magtan-aw gyud pag-ayo kun molabang sa karsada
CEBU, Philippines – Kinahanglang dili gyud dayon deretso nga motabok sa karsada hangtud nga maaninaw pag-ayo nga walay nagsingabot nga sakyanan nga posibleng makapadisgrasya sa tawo nga molabang.
Si SPO4 Rogel Layson, sakop sa Bogo City Police Station, nagkanayon nga kadtong 60-anyos nga si Ofelia Blanco mideretso lang paglabang sa karsada human mibayad og plete mao nga siya nadam-agan didto sa Barangay Libertad, dakbayan sa Bogo.
Si Corazon Arnoco, inahan sa drayber nga nagmaneho sa multicab nga nakadam-ag sa biktima, miingon nga igo-igo lang ang gikusgon sa sakyanan.
Apan tungod sa pagkalamba sa tiguwang ngadto sa karsada mao nga wala na gyud siya maluwas pa.
Matud ni SPO4 Layson nga posibleng wala gayud magtan-aw ang biktima sa nagsingabot nga multicab (YER 450) nga gimaneho ni Keanno Arnoco, 20, taga Barangay Poblacion, Bogo.
Nabantayan nga daghan pa gyud nga mga tawo nga magdanghag lang sa ilang pagtabok sa karsada maoy hinungdan nga sagad kanila malambigit og aksidente. – /RUB) (BANAT NEWS)
- Latest