Gitangtang sa trabaho namusil sa engineer

CEBU, Philippines – Kritikal ang usa ka project engineer nga gipusil og pugakhang sa iya kanhi trabahante sa Alta Vista Residences sa Pardo, Dakbayan sa Sugbo pasado alas 3 sa hapon.

Ang biktima giila nga si Manullet Caballero, 30-anyos, project engineer sa Alta Vista Residences, taga Talamban, samtang ang gitumbok nga suspek mao si Judy Algozo, hingkod, nga taga Barangay Toong.

Matud ni Senior Police Officer 3 Wetzel Berry, imbestigador sa homicide section sa Cebu City Police Office, nga naabot sa lugar ang suspek gumikan sa kasuko nga gitangtang sa trabaho ang iya’ng manghud.

Apan nasayran sa kapolisan nga natangtang sa trabaho ang manghud sa suspek gumikan kay daghan na kini og absent sa trabaho.

Una’ng nakalalis sa suspek ang foreman nga si Lucio ug niduol si Caballero ug gibadlong ang suspek.

Apan diha’ng paingon na unta molakaw ang biktima kalit lang kini gipusil tumong sa dughan.

Dali nga nisibat ang suspek samtang gidala sa Chong Hua Hospital ang biktima ug gikataho’ng anaa sa Intensive Care Unit (ICU).

Si Berry niingon nga ang suspek kanhi trabahante sa mao’ng dapit apan natangtang sa trabaho sa wala pa masayri nga hinungdan.

Samtang patay ang usa ka 55-anyos nga lalaki human gipusil sa dughan samtang paingon unta mamasaw sa iya’ng binuhi’ng baboy sa Sitio Kambitas, Barangay Babag II, Dakbayan sa Sugbo pasado alas 6 sa nakalabay nga hapon.

Ang biktima giila nga si Paulino Geraldino, minyo, mag-uuma ug nagpuyo sa mao’ng dapit.

Sumala pa sa anak sa biktima nga si Gerry nga samtang paingon ang iya’ng amahan sa ila binuhi’ng baboy, usa ka buto sa armas ang iya’ng nadungog ug sa iya’ng pagsubay nahagba na sa yuta ang biktima nga nagkadugo.

Sa imbestigasyon sa homicide section nasayran nga lagmit nagtago sa ngitngit nga bahin ang gunman nga nag-atang na’ng daan sa biktima nga mogawas.

Usa ka igo pinusilan ang naangkon ni Geraldino sa iya’ng dughan nga nilapos sa likod.

Dali pa unta nga gidala sa Vicente Sotto Memorial Medical Center (VSMMC) ang biktima apan gideklarar kini nga dead on arrival sa doktor.

Human sa hitabo dali nga nisibat ang gunman sakay sa motorsiklo.

Apan si Berry niingon nga ila’ng subayon karon ang anggulo sa yuta kay ila’ng nasayran nga wala’y kontra sa ila’ng dapit ang biktima.

Hinuon gawas sa mao’ng anggulo nihimo pa og laing pakisusi ang kapolisan sa uban pa’ng anggulo. – /GMR) (BANAT NEWS)