Mga kahoy sa Salinas Drive dili gyud ipaputol sa DENR

CEBU, Philippines – Ang kadagkoan sa Department of Environment and Natural Resources (DENR) wala pa gayud mohatag og pagtugot nga makuha sa Department of Public Works and Highways (DPWH) ang mga kahoy nga nakababag sa bag-ong gimugna nga aseras kilid sa TESDA sa Salinas Drive.

Si DPWH District Engineer Nicomedes Leonor mitug-an nga wala pa sila hatagi og permit sa DENR aron makuha unta ang mga punoan sa kahoy nga anaa na karon mahimutang sa aseras gikan sa ganghaan sa Waterfront Hotel paingon sa flyover duol sa TESDA.

Ang maong mga kahoy nahimutang pa kaniadto sulod sa koral sa TESDA apan sanglit ang karsada nga kabahin sa Salinas Drive wala may sidewalk mao nga misugot ang kadagkoan sa TESDA nga isibog ang ilang koral aron kabutangan og aseras ang kilid sa ilang compound.

Gitumong kini aron nga ang mga tawo nga maglakaw dili na anha moagi sa karsada nga makahatag og kakuyaw kanila ug makapahinay sa pagdagan sa mga sakyanan ug makamugna lang og problema sa trapiko.

Si Engr. Leonor miingon nga kay wala man mosugot ang DENR nga pamutlon ang mga kahoy, ang mga tawo nga moagi sa aseras mahasol gihapon kay ang dagko nga punoan sa kahoy, nakaali man sa ilang paglakaw.

Dinhi sa Sugbo adunay grupo nga nagpasiatab nga nagproteher sila sa mga kahoy nga gihulagway nila nga nakahatag og katahom sa mga dapit sa dakbayan. (BANAT NEWS)