Mabdos gilugos

CEBU, Philippines – Nadakpan sa Lapu-Lapu Police Station 5 ang usa ka construction worker nga gipasanginlang nilugos sa usa ka mabdos diha sa Sitio Commonwealth,  Barangay Ibo, Dakbayan sa Lapu-Lapu kagahapon sa buntag.

Ang gidakop mao si Junryll Gloria, 31, nagpuyo sa nahisgutang lugar, samtang ang biktima, usa ka 33-anyos nga duha ka buwang mabdos nga nag-abang sa maong lugar.

Ang suspetsado wala magduha-duha sa pag-angkon nga iyang gilugos ang biktima tungod kay ubos siya sa pagamit sa illegal nga drugas.

Nagbasol hinuon siya sa iyang nahimong krimen ug nitambag pa nga walay ayo ang usa ka tawo kung maulipon sa ginadili nga drugas.

Nasuta usab sa kapulisan nga daghan nang nabiktima ang suspetsado apan nahadlok tungod kay mauwawan. Nasuta nga aduna usab kini bench warrant tungod sa kasong attempted rape.

Matud pa ni Police Officer 1 Else Mandule, nitaho sa ilang buhatan ang biktima nga gilugos siya sa suspek sayo sa kaadlawon kagahapon ug sa pagresponde sa mga polis nadakpan kini dayon.

Sa imbestigasyon sa kapolisan nasayran nga natulog ang biktima sa boarding house dihang nakabantay kining adunay nisulod sa iyang lawak apan kalit siyang gitionan og kutsilyo ni Gloria ug gibaharang patyon kun mosinggit.

Bisan sa pagpakiluoy nga siya mabdos, gibuhat gyud ni Gloria ang krimen. Nakuha gikan ni Gloria ang duha ka gagmay nga pakete sa shabu, usa ka .38 revolver, upat ka bala, ug kutsilyo. – /EIM) (BANAT NEWS)