Tulo ka bata na-missing

CEBU, Philippines – Tulo ka bata ang gipangita sa kapolisan human gikatahong namasol sa kadagatan sa isla sa Olango sa miaging Domingo sa buntag apan wala na mabalik sa ilaha.

Matud pa ni Senior Police Officer 1 James Ariel Fuentes, ang na-missing mao sila si Jose Maria Eduardo Daño, Aaron Hida, pulos nagpangidaron  og 15 anyos ug si Shaun Michael Daño,9 anyos.

Ang Pagasa mipagawas daan og gale warning tungod kay peligro sa tanang gagmay nga sakyanan sa dagat ang dagkong bawod ug kusog nga hangin.

Sa inisyal nga imbestigasyon sa kapolisan, ang mga bata nga pulos residente sa barangay Baring sa maong isla ang gikatahong miadto sa dagat alas 11 sa buntag aron mamasol apan wala na mabalik.

Dugang sa polis, makamao molangoy ang mga bata kay pulos naanad na sila nga mamasol sa dagat kada buntag kung walay klase.

Nabalaka hinuon sila nga posibleng natikyaob ang gisakyang bangka sa mga bata ug napadpad sa dagat.

Sa pagkakaron, padayon gihapon ang search operation sa kapolisan ug mga sakop sa Philippine Coast Guard sa dakbayan sa Mandaue. - /EIM) (BANAT NEWS)