“Suspek” sa kamatayon sa scuba diver nadakpan

CEBU, Philippines - Nasikop sa kapolisan ang usa ka lalaki nga gipasanginlan nga maoy milabay og dinamita sa usa ka dive instructor nga napalgang naglutaw na sa dagat ug wa nay kinabuhi niadtong miaging semana sa Paypay, Daanbantayan.

Ang nasikop naila nga si Jindo Pepito, 21, kinsa gidakop tungod sa paggamit og dinamita ug nakuhaan usab kini niini nga iyang gamiton sa illegal nga panagat kagahapon sa kaadlawon.

Matud pa ni Senior Superintendent Noel Gillamac, director sa Cebu Police Provincial Office nga ang maong lalaki mao ang suspek sa kamatayon ni Al Bernard Coyoca nga gituohang gitirohan og dinamita.

Matud pa ni Gillamac, migawas ang pangalan sa suspek human sa ilang imbestigasyon.

Sumala pa ni Gillamac nga naalaang isda ang biktima diha sa ilawom hinungdan kini gidinamita.

Ang amahan sa namatay nga si Enrico, mibutyag sa kapolisan nga kaduha gilabayan og dinamita iyang anak sa ilawom.

Apan kagahapon sa buntag ang kapolisan sa maong lungsod nakadawat og taho nga may naniro na sab og dinamita sa maong lugar hinungdan nga giadto kini ni Senior Inspector Roger Quijano.

Misuway pa unta og ikyas ang suspek apan ilaha kining nadakpan. Sa ilang pagsusi nakuha kaniya ang  usa ka botelya nga may sulod gituohang pulbora sa eksplosibo nga gamiton pagtiro sa mga isda.

Apan matud pa ni Gillamac gihimakak sa suspek nga siya ang nagtiro og dinamita sa diver. Duna pay laing duha nga gipangita ang kapolisan nga giingong kauban ni Pepito.

Ang suspetsado mag-atubang karon og kasong kalapasan sa “Philippine Fisheries Code of 1998” samtang padayon ang pagtigom og ebidensya ug mga testigos kun may kalambigitan siya sa kamatayon ni Coyoca. (BANAT NEWS)