Druglords “tiwason”

CEBU, Philippines - Si kanhi kongresista Tomas Osmeña misaad nga kun makadaog siya pagbalik pagka mayor sa dakbayan sa Sugbo atol sa eleksyon sunod tuig, ‘tiwason’ niya ang nasugdang pagpanggukod sa mga druglords ug mga tigpayuhot og ilegal nga drugas.

Atol sa programa nga “Hello Cebu” sa sibyaanan DYLA kagahapon, si Osmeña miingon nga ang kampanya sa ilegal nga drugas dinhi sa dakbayan iyang hatagan og dako nga pagtagad kun makabalik siya sa City Hall. Giangkon ni Osmeña nga atol sa iyang administrasyon kaniadto duna gihapoy mga tigpayuhot og ilegal nga drugas apan matud niya nga daghan kanila ang nangamatay ug ang uban nanglayas.

“Sa akong panahon duna say daghang drug pushers apan sila namatay g’yud. Basta makabalik ko sa City Hall ako na nga tiwason ang mga druglord, kun dili sila mobalhin sa ilang operasyon sa Talisay ug Mandaue, ato sila nga ibalhin sa laing kalibutan,” bahad pa ni Osmeña.

Si Osmeña kaniadto gipasanginlan nga misuporta sa mga sakop sa giingong “vigilantes” nga responsable pagpatay sa kapin 200 ka tawo, sagad kanila nalambigit sa pagpangawat, tulis ug pagpayuhot og drugas, gihimakak kining tanan ni Osmeña.

Daghan na kaayo sa 80 ka barangay dinhi sa dakbayan nga nasudlan karon sa mga drug pushers sumala pa sa kapolisan sa dakbayan.

Ang pamahayag ni Osmeña iyang giluwatan agi og reaksyon sa plano ni Konsehal Gerardo Carillo nga kun siya makadaog pagka kongresista sa south district, mosang-at siya og balaudnon nga magpabuak sa dakbayan sa Sugbo ngadto sa upat ka distrito.

Matud ni Osmeña nga angay nga tutokan unta ni Carillo ang problema sa ilegal nga drugas, ilabi na diha sa barangay Duljo-Fatima, diin siya daghan og paryente. – /EIM) (BANAT NEWS)