Boxing gipalambo sulod sa CPDRC

CEBU, Philippines – Gipalukapa sa naghaguros nga kumo ang mga amateur boxers nga nanulong sa mga piniriso sa Cebu Provincial Detention and Rehabilitation Center (CPDRC).

Sila si Jorge Salugaol ug Marvin Narte nidaug sa 4-round nga binukbukay nga ila’ng gipakita sa mga manan-away ug mga boxing promoters nga aduna sila’y igo’ng katakus sa pamoksing bisan anaa sulod sa prisohan.

Matud ni Narte nga hilig niya ang duwa nga boxing ug gani na-ingganyo kini sa pagpadaku sa iya’ng lawas pinaagi sa subsob nga exercise ug mga moves nga nakita niya sa boxing ilabi na sa istilo ni Manny Pacquiao sa matag duwa.

Nabansay siya tungod sa usa ka piniriso nga kanhi boxer nga nagsilbi’ng coach sa mga bagito nga mga piniriso’ng boksidor.

Ang CPDRC boxing event gipaluyohan sa usa ka boxing promoter gikan sa Thailand kauban si Rex Wakee Salud kinsa mao’y nihatag sa premyo atol sa duwa.

Matud ni Capitol consultant on jail matters Marco Toral nga duna’y igo’ng facility ang mga piniriso sa  pagbansaybansay sama sa punching bag, dumbbells ug mga kagamitan sa boxing.

Giklaro ni Toral nga ubay-ubay nga sports activities ang anaa sulod sa CPDRC nga gipahimuslan sa mga priso alang sa ila’ng recreational activity ug nalakip sa ila’ng rehabilitation program. Ang mga piniriso nalipay sa pribilihiyo nga naangkon sanglit ang ila’ng damgo nga mamahimo’ng boxer natuman samtang napriso.

Ang duha ka piniriso nag-atubang og kaso’ng murder.

Atol sa duwa adunay presensya sa medical doctor kauban ang mga medical team, professional referee ug mga security personnel.

Ang CPDRC una na’ng naila sa mga dancing inmates nga nisikat sa YouTube ug sa social media.

Daku ang kalipay ni Toral sa mao’ng kalihukan nga nakapawala sa stress ug kamingaw sa pamilya sanglit na-focus sila sa ila’ng practice ug pagtuon sa dugang pa’ng technique sa ila’ng pasundayag niini.

Kini ang hinungdan nga nalikay ang mga piniriso sa kaso sa suicide tungod kay halos tanan nga mga piniriso adunay giatubang nga kalingawan.

Ang kita sa kalihukan gihipos ubos sa panudlanan sa grupo ug gigamit alang sa pagtukod sa ila’ng bag-ong kapilya sulod sa prisohan. – /GMR) (BANAT NEWS)