Mga tulisan sa Talisay migara og mayo

CEBU, Philippines – Migara na og maayo ang mga tulisan sa dakbayan sa Talisay ning nanglabay nga mga adlaw.

Labing uwahi nilang biktima ang manag-uyab ug usa ka dalaga diha sa Baywalk sa barangay Dumlog niadtong Biyernes sa gabie.

Matud pa naglakaw padung pauli gikan sa trabaho si Pinky Ytoc, 26, nagpuyo sa Deca Homes Subdivision niadtong tungora dihang kalit siyang giduol sa duha ka armadong lalaki.

Ang mga tulisan diha ra nagpahipi sa ngitngit nga bahin sa lugar dili layo sa guard house.

Dihang gitionan siya og armas, way nahimo ang biktima ug gihatag na lang iyang bag nga adunay sulod kwarta nga P4,500, cellphone, mga ID ug uban pa niyang mga butang.

Apan paglabay og duha ka oras, ang mag-uyab sila si Rainer Henderson Delda, 19, ug si Kate Abaquita, 18, nagpuyo sa barangay  Dumlog, dakbayan sa Talisay mao na say gibiktima sa duha gihapon ka mga lalaki.

Matud pa nga naglakaw ang duha sa dihang gisita sa mga lalaki nga armado ug mideklarar og tulis. Gikuha gikan sa duha ang tulo ka cellphone.

Nabantayan nga sa nangaging mga adlaw, nigrabe ang mga kaso sa pagpanulis diha sa dakbayan sa Talisay nga binuhatan sa mga lalaking magsakay og motorsiklo.

Ang kapolisan padayon pang naghimo og imbestigasyon aron pagtumbok kun si kinsa ang maong mga tulisan. – /EIM) (BANAT NEWS)