Duha ka bata patay sa dengue

CEBU, Philippines - Usa ka polis ang mag-atubang og kasong administratiba ug criminal human gireklamo sa usa ka babayeng call center agent tungod sa paglabay niini og bato sa iyang gipuy-an ug nanuok sa babaye.

Ang 27 anyos nga babaye nga nagpatago lang sa iyang pangalan ang nagpakitabang sa buhatan sa Police Regional Office-7 kagahapon sa buntag ug mihatud sa iyang reklamo batok ni Police Officer 1 Juanito Libres Jr., nadestino sa Casuntingan Police Station isip beat patrol police.

Ang dalaga miingon nga nasuko kaniya si Libres ug gipasanginlan siya niini nga maoy nagpadala og picture nilang duha sa polis ngadto sa FB account sa uyab niini. Ang polis ug ang dalaga magsilingan ra sa  barangay Casuntingan dakbayan sa Mandanue.

Dugang pa sa dalaga nga pasado alas 10 sa nakalabay nga gabii sa Lunes samtang kini didto sa iyang gipuy-an nga nagtan-aw og telebisyon kalit lang kini nakadungog og lagubo.

Sa unang higayon gibalewala lang niya apan naigking siya kay dunay dakong bato nga nitugpa duol sa iyang gihigdaan maong nangutana siya sa mga silingan kung kinsay namato apan way naningog.

Apan sa dihang paingon na unta kini sa pag-abri sa pultahan aron pagsubay sa gawas gisugat siya ni Libres nga naka uniporme pa nga daw hubog ug kalit siyang gibanghagan sa pag-ingon: “Nganong sige man ka og panghilabot sa akong uyab!”

Matud pa sa dalaga, gikasab-an siya niini nganong nagsige og post sa Facebook sa picture nilang duha ug nagpadungog-dungog batok sa uyab ni Libres. Apan kini kusganong gihimakak sa reklamante kay matud niya, di sila ‘friends’ sa uyab sa polis diha sa Facebook.

Apan human niya kini gitubag gikatahong gituok siya niini   ug gitukmod. Maayo na lang nga dunay mibadlong kang Libres.

Human sa hitabo gikuyogan ang dalaga sa iyang amahan ngadto sa Casuntingan Police Station aron i-report ang hitabo apan igo lang sila gitambagan sa desk officer adto sa barangay modangop kay wala man daw kuno siya bun-og sa lawas.

Nasuta usab niya nga wala gani  ibutang sa blotter sa kapulisan ang iyang reklamo ug igo lang kini gihatagan og numero sa telepono sa police station aron tawagan kung ugaling mobalik ang polis sa iyang gipuy-an.

 “Nakapangutana gyud ko. Pwede diay na nga dili nila i-blotter abi kay walay bun-og?” dugang pa sa dalaga.

Sa maong hitabo midiretso na lang kini og adto sa Mandaue City Police Office aron maatiman ang iyang reklamo ug didto na kini giatiman.

Apan si Libres dihang gikuhaan og pamahayag bahin sa reklamo sa dalaga kusganon niya kining gihimakak.

Si Libres miingon nga igo lang niya giadto ang dalaga sa iyang gipuy-an aron estoryahan nga hunongon na ang pagsige niini og hilabot sa iyang uyab. Giklaro usab ni Libres nga wa silay relasyon sa reklamante.

Samtang ang hepe sa RIDMD-7, Supt. Henry Biñas miingon nga ilang imbestigaran ang maong hitabo apil na kadtong polis nga wala moatiman sa dalaga diha sa Casuntingan Police Station.

Si Biñas miingon nga tanan nga reklamo nga maabot sa buhatan sa kapulisan kinahanglan nga tagdon bisan unsa pa kini ug dili ipasa sa ubang buhatan.  (BANAT NEWS)