Wa’y lisensiya apan may shabu

CEBU, Philippines – Gidakop sa checkpoint ang nagmaneho og motorsiklo nga wala’y lisensiya ug nasakmitan og shabu alas 12 pasado sa niagi’ng tunga’ng gabii sa dakbayan sa Mandaue.

Si Police Officer 2 Jesson Flores niila sa nadakpan nga si Wilvic Colina, 32, minyo nga nagpuyo sa barangay Mantuyong.

Matud ni Flores nga nagsakay ang dinakpan og motorsiklo hangtud nga nahiagi sa gipahimutang nga checkpoint sa kapolisan sa Presinto 1 sa dalan A. Del Rosario, sa mao’ng barangay.

Dugang ni Flores nga si Colina nakamatikod sa kapolisan sa checkpoint apan ang mga polis nga nagtago lang sa ngitngit ang dali nga nisugat niini.

Matud ni Flores nga sa paghunong sa motorsiklo ni Colina dali usab nga gipangayoan sa mga polis sa iya’ng lisensiya sa pagmaneho apan wala’y napakita.

Girekisa sa kapolisan si Colina ug nakuha ang usa ka pakete’ng shabu hinungdan sa iya’ng pagkatanggong sa detention cell. – /GMR) (BANAT NEWS)