MCDA bill gipaspasan
CEBU, Philippines - Gipaspasan sa Metro Cebu Development and Coordinating Board (MCDCB) ang paghan-ay sa balaudnon sa pagmugna sa Mega Cebu Development Authority (MCDA).
Si Gobernador Hilario Davide III ang nangulo sa komitiba nga nag-finalize ug nag-review sa unod sa balaudnon samtang nitabang usab si Roberto Aboitiz, ang presidente sa Ramon Aboitiz Foundation Inc., ang co-chairman sa MCDCB.
Si Davide nihatag hangtud sa Septiyembre 23 sa mga sakop sa MCDCB sa pagduso sa ila’ng mga sugyot nga ilakip sa balaudnon.
Ang draft bill gikatakda’ng iduso sa una’ng semana sa buwan sa Oktubre sa Kongreso pinaagi ni Kongresista Raul del Mar sa Cebu City North District.
Naduso na ang una’ng bill 20 ka tuig na ang nakalabay apan wala gyud napasar.
Ang Japan International Cooperation Agency (JICA) kinsa mao’y nihimo sa Mega Cebu Road Map Study niawhag sa MCDCB kabahin sa pag-institutionalize sa proyekto.
Gawas ni del Mar, sila si Kongresista Gabriel Luis Quisumbing sa ika-unom nga distrito ug Kongresista Gerald Anthony “Samsam” Gullas sa una’ng distrito sa probinsiya ang interesado usab nga mo-sponsor sa bill. (BANAT NEWS)
- Latest
