50 balay naugdaw

CEBU, Philippines - Gibanabanang 50 ka mga balay ang naugdaw sa dakong sunog  sa sitio Lapyahan, barangay Labogon, dakbayan sa Mandaue sa miaging Biyernes sa gabii.

Ang maong sunog nakontrolar sa Bureau of Fire Protection (BFP)-Mandaue paglabay sa 42 minutos  ug nagbilin og P500 mil nga danyos niini. Si Senior Fire Officer 3 Cefriano Codilla nga maoy duty field investigator miingon nga ang kalayo didto magsugod sa ikaduhang andana sa panimalay nga gipanag-iya ni Melecio Lagrado.

Matud niya pulos ginama sa light materials ang kabalayan sa lugar hinungdan nga dali kaayo nga mikatap.

Matud pa ni Codilla gipaubos sa Task Force Alpha ang alarma aron makatabang ang kabomberohan gikan sa Consolacion, dakbayan sa Lapu-Lapu, dakbayan sa Sugbo, Filipino -Chinese Volunteer Fire Brigade, Emergency Rescue Unit Foundation (ERUF) ug uban pa.

Si Codilla miingon nga ang baratohon nga ceiling fan sa kisame sa ikaduhang andana sa panimalay ni Lagrado maoy hinungdan sa pag-ulbo sa kalayo tungod sa pag-over heat niini.

“Kini laging mangyawat sa pagpalit og baratohong ceiling fan nga made in China moresulta gyud og sunog kay dali man gud na mo-overheat,” pasabot pa niya.  

Nalangay usab ang mga bombero pagsulod sa lugar tungod sa mga nag-overnight parking nga mga sakyanan sa daplin sa karsada.

“Naalihan man gud ang dalan sa mga nag-parking nga sakyanan, nakalangan gyud atong pagpasirit kay mga nagpuyo sa maong dapit nangita pa man sa mga tag-iya,” dugang pa niya.

Wa hinuoy nasamdan o nakalas sa maong hitabo.

Samtang alas 11:45 ang takna  kagahapon sa buntag  laing sunog  ang nahitabo sa barangay Calawisan, dakbayan sa Lapu-Lapu human naugdaw ang panimalay ni Roberto Baguio.

Nakan-an usab sa kalayo ang sikbit nga panimalay ni Armando  Taping apan dali nga napawong sa mga bombero. Ang sunog nagbilin og danyos nga P80 mil. (BANAT NEWS)