Fire Station sa capitol ibalik
CEBU, Philippines – Nagtinguha ang Bureau of Fire Protection-7 nga ibalik ang fire station sulod sa Capitol compound.
Matud ni BFP-7 Director Esmael Codilla nga ang Kapitolyo usa ka vital installation building ug nagkinahanglan nga adunay fire station sa duol.
Gibutyag ni Codilla nga kaniadto adunay fire station sa Kapitolyo apan gipakuha ni kanhi gobernador Gwendolyn Garcia nunot sa paggamit sa lugar.
Dugang ni Codilla nga buot niya’ng matuman na ang proyekto niini’ng tuiga sa dili pa siya moretiro sa katungdanan sunod tuig.
Samtang kinahanglan nga modonar og luna ang mga lungsod nga wala pa’y fire station aron mahatagan og fire truck.
Si Codilla nibutyag nga 13 ka lungsod sa probinsiya ang wala pa’y fire station nga gilangkuban sa Asturias, Ronda, Alcantara, Alegria, Badian, Samboan, Santander, Alcoy, Catmon, Pilar, Tabogon, Borbon ug Santa Fe.
Matud ni Codilla nga matag usa ka lungsod padonaron og 315 metro kwadrado nga luna isip rekisitos aron sila mahatagan og usa ka fire truck gikan sa nasudnong kagamhanan.
Gibutyag ni Codilla nga ang nasudnong kagamhanan gikatakda’ng manghatag og 469 ka fire trucks lukop nasud.
Sa una’ng hugna, 80 ka fire trucks ang naapod-apod na ug tulo niini ang nahatag sa Rehiyon 7 ug bugtong ang lungsod lang sa Tuburan ang una’ng nakadawat sa Sugbo.
Sa ikaduha’ng hugna adunay laing 80 ka fire trucks na usab ang ipanghatag.
Si Codilla nanghinaut nga ubay-ubay ang mahatag sa Rehiyon 7.
Kadto’ng mga lungsod nga may luna na ang first priority sa mga maabot nga fire trucks ug ikaduha nga priority ang nagproseso na sa ila’ng mga dokumento sa lote nga idonar. – /GMR) (BANAT NEWS)
- Latest
