DOH 7: Basura hinungdan sa dengue outbreak
CEBU, Philippines - Dunay pahimangno ang Department of Health (DOH)-7 sa katawhan nga dili magpasagad og labay sa mga basura tungod kay usa kini sa mahimong puy-an sa mga lamok sama sa nahitabong dengue outbreak didto sa Guihulngan ug Canlaon sa Negros Oriental.
Nasuta nga padayon ang gihimong pag-monitor sa Regional Epidemiology and Surveillance Unit (RESU)-7 sa lungsod sa Balamban ug Daanbantayan sa posibilidad nga duna usab outbreak nga mahitabo sa maong mga lugar.
Matud sa pangu sa RESU-7 Rennan Cimafranca, daghan sa mga basura ang masudlan og tubig ug mao kini nag-una nga rason sa nahitabong outbreak sa Negros Oriental.
Sigon sa ahensiya kadaghanan sa mga naigo sa maong sakit mga tinun-an sa Negros Oriental State University sa Poblacion, Guihulngan nga nag-edad og 16 anyos ngadto na sa 20-anyos.
Gitataw ni Cimafranca, ilang gibisita ang Guihulngan ug Canlaon niadtong miaging semana ug gihulagway niini ang Canlaon nga epidemic lang ug nagkaubos na ang kaso sa dengue sa maong mga dapit.
Gipaabot nga sunod semana i-downgrade na nila ang status sa Canlaon, apan sa habig sa Guihulngan giingong miabot og 50 ang biktima sa dengue ug padayong nagkadaghan ang kaso.
Gipasabot ni Cimafranca sa publiko importante ang pagpanglimpyo sa palibot aron walay dapit nga mahimong kapuy-an sa mga lamok.
Gipahibalo sa RESU nga nag-una gihapon ang siyudad sa Sugbo nga dunay taas nga kaso sa dengue hinuon ubos kini itandi sa nanglabay’ng katuigan. (BANAT NEWS)
- Latest