Asa ipasaka ang kaso vs blackmail syndicate?
CEBU, Philippines - Naglibog karon ang mga otoridad sa Police Regional Office-7 ug sa Taipei Economic and Cultural Office (TECO) kun asa ipasaka ang kaso batok sa 69 ka mga Taiwanese ug Chinese nationals nga giingong sakop sa blackmail syndicate.
Kini human nga ang maong mga suspek nakalapas sa Immigration Laws sa Pilipinas ug Republic Act 8484 kon Access Devices Regulation Act, apan sa samang higayon nakalapas usab sila sa mga balaod didto sa Taiwan diin nagpuyo ang ilang mga biktima.
Matud pa nga gusto sa TECO nga makanselar dayon ang mga pasaporte sa maong mga suspek aron awtomatiko silang ipa-deport didto sa Taiwan aron didto lutoson ang kaso gumikan kay taga didto man ang ilang mga biktima.
Samtang ang Police Regional Office-7 gusto usab nga masilotan ang maong mga langyaw tungod sa paglapas nila sa mga balaod dinhi.
Si Chief Supt. Prudencio Tom Bañas mitug-an sa mga tigbalita nga mahimo kaayo nilang ipasaka ang kaso.
Sa laing bahin, gustong ipatawag ni Cebu City acting Mayor Edgardo Labella sa Police Coordinating and Advisory Council ang mga tag-iya sa mga panimalay nga gipuy-an sa mga langyaw nga gigamit sa Cyber Crime Operation.
Gipadayag ni Labella nga dunay tulobagon ang mga tag-iya tungod sa pagpapuyo sa maong mga langyaw nga ang tumong mao ang paghimo og krimen.
Gimandoan ni Labella ang OIC- City Police Director Marciano Batiancela paghimo og imbestigasyon sa kalambigitan sa mga tag-iya sa mga panimalay ug kun duna bay local contacts ang sindikato dinhi.
Ang mga suspek nadakpan sa Brgy. Talamban ug Guadalupe dinhi sa siyudad sa Sugbo pinasikad sa siyam ka search warrants.
Makigtagbo usab si Labella kang Casimiro Madarang III, Alien Control Officer sa Bureau of Immigration,aron tukion ang pagkasikop sa mga langyaw.
Si Labella, nibutyag nga dili basta-basta lang i-deport ang maong mga langyaw kay kung nakahimo sila og krimen dinhi sa dakbayan kinahanglan dinhi sila pasakaan og kaso ug prisuhon.
Ang pagkasikop sa sindikato natigayon base sa impormasyon nga gihatag sa TECO kalabot sa sindikato nga nangilkil sa ilang mga kababayan didto pinaagi sa pagpailang tigkolekta sila og buhis ug napaso na sila pagbayad niini apan mahimo lang aregluhon kun mobayad sila diha agi sa ilang bank accounts. (BANAT NEWS)
- Latest