KBP Month gibuksan

CEBU, Philippines – Pormal nga gibuksan kagahapon ang mga kalihukan sa Kapisanan ng mga Brodkaster ng Pilipinas (KBP) Month sa Southwestern University (SWU) Activity Center uban sa tema, “Kauban ang mga brodkaster sa pagtambayayongay.”

Gibuksan ang kalihukan sa Santos nga Misa nga gidumala sa manager sa DYRF/Power FM, Fr. Roberto M. Ebisa, nga gitambungan sa mga opisyal ug sakop sa KBP-Cebu chapter.

Gibahin ni Ebisa sa pagpasabot ang tema nga naglangkub sa pagtambag ug yayong diin magtatambag ug moyayong sa panaw sa katawhan ilabi na sa inadlaw-adlaw nga kalihukan.

Gipili usab ang Mr. and Ms. KBP aron mao’y morepresentar atol sa pagbukas sa Press Freedom Week karong Septiyembre 20 diin ang niguwa nga mananaug mao sila si Roy Lester Gimenez ug Irish Dale Leceña gikan pulos sa RMN/iFM Lahi ra!

Gipahigayon usab ang nagkadaiya’ng ball games nga naglangkub sa volleyball ug basketball nga giapilan sa mga sakop sa KBP.

Ang chairman sa KBP-Cebu, Manny Galicia, niawhag sa mga sakop nga higugmaon ug suportahan ang KBP ug dili gamiton sa personal nga agenda.

Umaabot nga kalihukan naglangkub sa nagkadaiya’ng gabii para sa mga talents, news and public affairs, DJ ug admin night ug grand KBP night. – /GMR) (BANAT NEWS)