Dengue sa Toledo City niubos

CEBU, Philippines – Tungod  sa subsob nga kampanya sa Toledo City Health Department sa makamatay nga sakit nga dengue niubos karon ang kaso sa maong sakit sa siyudad.

Kini maoy gitug-an ni Antonio Layan ang sanitary inspector sa city health.

Nasayran nga gikan sa ikatulo sa adunay labing daghan nga kaso sa dengue sa tibuok Sentral Visayas anaa na sa ikaunom ang dakbayan nga adunay daghang nga kaso sa dengue. Matud ni Layan nga hugot ang ilang kampanya sa pagpanlimpiyo sa palibot ilabi na sa posibleng itlogan sa mga lamok sama sa mga botelya, lata, flower vase, ligid ug uban pa.

Dugang sa maong opisyal nga wala na sila magsalig sa spraying nga pamaagi sa pagpukan sa mga lamok sanglit aduna nay klase sa mga lamok nga dili madutlan niini.

Mas epektibo nga pamaagi mao ang pagguba sa puy-anan sa mga lamok ug ang pagmentinar sa kalimpiyo sa palibot.

Gawas sa pangpanglimpiyo aduna usab information drive nga gipahigayon ang mga sakop sa city health aron mas momenos pa ang kaso sa dengue sa siyudad.

Karong mga bulana, ang Toledo City nakatala lamang og 102 ka mga kaso sa dengue, mas ubos itandi sa miaging mga buwan.

Base sa report sa The Freeman niadtong Hulyo ning tuiga gikan sa talaan sa Regional Epidemiology and Surveillance Unit, adunay 2,662 ka mga kaso sila nga natala sa Central Visayas, 14 niini ang namatay gikan sa nagkalain-laing kalungsoran ug siyudad sugod pa niadtong Enero hangtud Hulyo 25.

Adunay usa nga namatay sa Toledo City ug mao usab sa Cebu City, Dauin, Bacong, Tayasan ug Pamplona sa Negros Oriental, Dauis, Bilar, Batuan, ug Cortes sa Bohol, ug sa Daanbantayan.

Matud pa sa RESU, ang mga kaso sa dengue sa Central Visayas nisaka og singko porsiyento karong tuiga kun itandi sa samang mga bulan sa miaging tuig nga miabot lang og 2,532 ka kaso.

Sa gihapon, ang Cebu City maoy nag-una sa listahan sa adunay labing daghan nga kaso sa dengue nga 18.5 porsiyento, ikaduha ang Lapu-Lapu City, Dumaguete City, Toledo City ug  Liloan. – /EIM) (BANAT NEWS)