Bata gianod sa baha

CEBU, Philippines – Usa ka 7-anyos nga bata gibanlas sa kusog nga bul-og sa baha diha nga mipugos siya paglabang aron nga makapauli sa ilang balay human sa ilang klase didto sa Barangay Babag, dakbayan sa Sugbo kaniadtong miaging Huwebes.

Gisuwerte pa si Guillan Cabingatan, grade 2 pupil sa Babag Elementary School, kay human siya gibanlas sa baha nasangit siya sa gamot sa kahoy daplin sa sapa. Apan ang bata nga anaa karon sa lisud pa nga kahimtang sa Cebu City Medical Center (CCMC) natakboyan og grabe nga pneumonia kay nakainom siya og daghang tubig sa sapa.

Matud ni Konsehal Dave Tumulak nga ang ginikanan sa bata nangayo’g tabang gikan sa kagamhanan sa dakbayan aron maluwas ang ilang anak nga nakasinati og pneumonia.

Kaniadtong Huwebes sa udto mibunok ang kusog kaayo nga uwan ug nakamugna og baha didto sa Babag, usa ka barangay sa bukid nga bahin sa dakbayan sa Sugbo.

Ang bata milabang g’yud sa sapa aron nga makauli siya sa ilang balay. (BANAT NEWS)