Bana mipadakop sa asawa ug maguwang kay nagtaban

CEBU, Philippines - Nasakpan ug gipapriso sa usa ka bana ang iyang asawa ug ang iyang maguwang nga iyang natultolan sa balay nga ilang gidangpan human ang duha nagtaban sayo sa buntag sa miaging adlaw diha sa Brgy. Lombo sa lungsod sa Moalboal.

Si Police Officer 2 Romeo Legazpi Sr., desk officer sa Dumanjug Police Station, miingon nga ang bana nga si Juan (di tinuod nga pangalan) nangita sa iyang asawa tungod kay wala na ni miuli sa ilaha.

Nahibaw-an na lang niya sa usa ka drayber sa habal-habal nga maoy naghatod sa duha gikan sa Dumanjug padulong sa Moalboal nga didto sila midangop sa usa ka balay sa kaliwat sa babaye.

Hinungdan nga ang bana nagpatabang sa kapolisan aron sa pagsuta kun tinuod nga gitaban iyang asawa sa iyang maguwang.

Ang hepe sa Dumanjug nga si Senior Insp. Jose Rovic Villarin, kauban ang mga sakop sa Women and Children’s Protection Desk mikuyog sa bana ngadto sa Brgy. Lombo.

Didto ilang naatlan ang maguwang sa bana ug ang iyang asawa sulod sa maong balay hinungdan nga ila kining gidakop ug planong kasohan.

Nasuta nga niadto pa lang bulan sa Enero nagpakasal ang reklamante ug iyang asawa.

Apan sa paglabay sa mga bulan nakabantay kining daw dunay relasyon ang iyang asawa ug ang iyang maguwang.  (BANAT NEWS)