Duha patay, usa angol

CEBU, Philippines - Patay ang duha ka tawo ug naangol usab ang kauban nilang pasahero dihang natagak sa kilid sa karsada ang gisakyan nilang motor diha sa Brgy. Obong sa lungsod sa Dalaguete.

Ang namatay mao sila si Aniana Anoba, 65, tungod sa pagtugpa niini una ang ulo sa dakong bato ug ang drayber nga si Eduardo Delfan, 24.

Samtang si Marlyn Delfan, 42, padayon pa karong gitambalan sa Vicente Sotto Memorial Medical Center tungod sa  naangkong grabeng kadaot sa iyang lawas.

Sumala pa ni Police Officer 2 Leo Gesim, ang tulo gikan sa Sitio Tubod ug padulong unta sila sa Brgy. Obong Proper dihang nawad-an og brakes ang motor samtang nagdulhog sa dalan.

Matud pa naglisod si Eduardo paghunong ug nalahos sila sa kimba kilid sa dalan.

Apan sumala pa ni Gesim , bisan og mabaw ra ang natagakan sa mga biktima, batuhon ang ilang gitugpahan.

Si Anoba dead on the spot samtang ang magtiayong Delfan diha kilid sa karsada nga pulos samaron ug gidala ngadto sa Julio Cardinal Rosales Hospital sa Dalaguete apan gibalhin dayon sa VSMMC apan namatay g’yud si Eduardo.  (BANAT NEWS)