Uyab gipatay, naghikog ‘sab

CEBU, Philippines – Patay ang duha ka manag-uyab human gidudahang gipusil sa 28- anyos nga usa ka engineer ang iyang 20- anyos nga kapuyo sud sa ilang lawak diha sa Sitio Little Dalaguete, Brgy. San Nicolas Proper ning dakbayan sa Sugbo kagahapon sa buntag.

Giila ang mga namatay mao sila si Engr. Meljohn Niel Olmedo, nagtrabaho sa IT Park ug Jennylyn Avila, lumad nga taga Leyte, nagtungha sa usa ka pribadong kolehiyo dinhi sa dakbayan ug nagkuha’g kurso nga HRM.

Ang duha adunay igo sa walang bahin sa ilang tampihak  gikan sa kalibre .45 nga pistola nga narekober diha sa crime scene.

Matud pa ni Senior Police Officer 4 Alex Dacua sa Homicide Section sa Cebu City Police Office nga nahinabi sa Banat News  nga anggulo sa selos ang ilang gitan-aw sa motibo sa maong krimen.

Sumala pa ni PO1 Salvador Cabasa sa Homicide Section, sayo sa buntag naabot sa balay sa lalaki si Avila ug misulod sa lawak hangtod nahitabo ang kremin.

Usa sa mga barkada ni Jennylyn nga si Kizia Balolong mibutyag nga ilang nabantayan nga nagsige na og away ang duha gumikan sa selos human nasakpan sa lalaki nga dunay laing uyab ang iyang amiga. Apan nahusay na kini ug nagkauli na ang duha niadtong Domingo.

Nasuta nga diha sa sulod sa lawak ang menor de edad nga ig-agaw ni Olmedo kinsa ayha lang nakamata sa ikaduhang pagbuto sa armas ug nakita na lang niyang nahagba na ang duha sa higdaanan ug pulos nagkadugo ang ulo.

Sa pakighinabi sa Banat News sa pamilya sa biktima, ang inahan sa lalaki nga si Delia kini mikompirmar nga nag-away ang duha niadtong nakalabay semana apan nagkapinasayloay ra.

“Gihusay pa man gani na nako sila pag miaging adlaw(Domingo). Na okay na man unta ‘to. Nagdungan pa mi’g kaon tanan pag Domingo,” matud pa ni Delia.

Ang duha giingong upat ka tuig na nga manag-uyab ug bag-o lang gayod   nagpuyo.

Sulod sa lawak nakuha sa kapulisan ang usa ka .45 caliber pistol nga duna’y usa ka magazine nga naa’y onse ka mga bala ug duha ka basiyo sa bala niini. – Decemay Padilla ug Rowena Capistrano/EIM) (BANAT NEWS)