17-anyos gilugos sa biyudo

CEBU, Philippines – Nagtingkagol na sa prisohan sa Samboan Police Station ang 58-anyos nga biyudo kinsa gipasanginlang nilugos sa 17-anyos nga babaye nga adunay problema sa pangisip niadto’ng Sabado.

Domingo na sa buntag nagpakitabang sa kapolisan ang amahan sa biktima human nitug-an ang batan-on sa gihimo sa ila’ng silingan nga biyudo.

Sa imbestigasyon sa Women and Children’s Protection Desk sa Samboan Police Station nasayran nga samtang nagkabo og tubig ang biktima kalit lang niabot ang suspek ug nihinol sa pribado’ng parte sa lawas sa biktima.

Ang biktima nitug-an sa kapolisan nga giingnan siya og “I love you” sa suspek dayun hikap sa iya’ng dughan, gihagkan sa ngabil ug gihikap ang pribado’ng bahin sa ubos sa iya’ng lawas.

Gawas sa paghinol ug paghalok sa suspek, nasayran sa kapolisan nga nahilabtan gyud ang batan-on gumikan kay mingaw ang dapit ug wala’y nakapugong sa gihimo sa suspek. Dali nga gipangita ang suspek ug nadakpan sa iya’ng balay. Ang suspek niangkon nga gumikan sa iya’ng kahinam iya’ng nahimo ang krimen.

Kagahapong adlawa gidala sa pink room sa Vicente Sotto Memorial Medical Center (VSMMC) ang batan-on.

Kung makuha na ang resulta sa eksaminasyon, pasakaan og kaso’ng rape ang suspek. – /GMR) (BANAT NEWS)