Illegal fishing hagit sa kapitolyo

CEBU, Philippines - Human nahatagi og pasidungog sa Camp Crame ang Kapitolyo tungod sa kampaniya batok sa ilegal nga panagat, ang officer-in-charge sa Provincial Anti-Illegal Fishing Task Force nagkanayun nga usa kini ka daku’ng hagit ngadto kanila.

Si Atty. Chad Estella nagkanayun nga daku nga hagit sa task force ang pagmintinar sa kampaniya batok sa ilegal nga panagat.

Ang mao’ng pasidungog sa nilabay’ng tuig pa nga mga operasyon sa probinsiya batok sa ilegal nga panagat.

Matud ni Estella nga ang mga operasyon sa nilabay’ng tuig ilaha ug sa kanhi hepe sa task force nga si Loy Madrigal.

Si Estella mao’y pangulo sa Provincial Environment and Natural Resources Office (PENRO) nga lakip sa mga operasyon sa pagprotektar ug pagpreserbar sa kalikupan.

Subay niini, si Estella nagkanayun nga sa pagkakaron naghuwat siya sa mga patrol boats nga magamit sa ila’ng operasyon.

Gibutyag niya nga sa nilabay’ng adlaw, ang Ramon Aboitiz Foundation Inc. (RAFI) nipahibawo nga modonar sila og duha ka patrol boats.

Usa sa patrol boat gamiton alang sa seaborne patrolling sa Tañon Strait ug ang usa alang sa operasyon sa probinsiya.

Dugang ni Estella nga naglaum siya nga sa dili pa matapos karong tuiga duna sila’y upat ka patrol boats. (Brenda D. Batuto/GMR)(BANAT NEWS)