2-anyos gidudahang namatay sa meningo

CEBU, Philippines - Usa ka 2 anyos nga batang babaye taga Tinaan sa dakbayan sa Naga ang gidudahang namatay tungod sa sakit nga meningococcemia sa miaging  gabii diha sa   Vicente Sotto Memorial Medical Center.

Matud pa ni Renan Cimafranca, pangulo sa Regional Epidemiology and Surveillance Unit  sa Department of Health-7, dunay mga nakitang sintomas sa bata nga sama sa maong sakit.

Niadtong Agosto 18, taas kaayo ang hilanat ug adunay mga nanurok sa iyang panit hinungdan gidala kini sa VSMMC apan pagkasunod adlaw namatay kini dayon.

Sumala pa ni Cimafranca, wala silay laboratory confirmation nga nagpamatuod nga meningococcemia gyud ang maong sakit apan aron makasiguro mokuha sila og specimen sa namatay nga bata.

Gisubay na usab nila kung asa ug kinsa ang uwahing mga nakauban sa maong bata sa wala pa kini namatay aron ilang mahatagan daan og Prophylaxis treatment tungod kay makatakod ang maong sakit.

Base sa Death Certificate sa maong bata nga nakita sa Banat News namatay kini tungod sa septic shock ug gidudahan nga Meningococcemia ang hinungdan niini. (BANAT NEWS)