Kooperatiba gitulis, P300 mil nasakiyo

CEBU, Philippines - Nagbinugtong nga armadong tulisan misakiyo sa gibanabanang  P300 mil  nga cash nga gidala sa Human Resource Officer (HR) sa Dranix Employees Multipurpose Cooperative sa F. Llamas Street nga alang unta pang sweldo sa mga trabahante diha sa Brgy. Punta Princesa ning dakbayan sa Sugbo kagahapon sa hapon.

Ang gitulis mao si Glenn Tabada, 36, samtang ang nagbinugtong nga tulisan ang gihulagway nga nagkalo ug nagsuot og shades.

Matud pa ni Chief Inspector David Señor, hepe sa Theft and Robbery Section (TRS) sa Cebu City Police Office nga nahinabi sa Banat News usa lang ka tulisan ang mitulis sa biktima apan nagtuo siya nga aduna kini kauban nga nagpaabot sa gawas.

Sumala pa ni Señor nga gikan sa bangko ang biktima nga nag-withdraw sa P280, 443.00 nga iyang gisulod sa envelope.

Apan sa pagkanaog niini sa iyang sakyanan ug misulod sa ilang opisina kalit lang misunod dayon ang tulisan ug dayon layog niini ug gitionan og revolver ug gikuha ang envelope.

Nabantayan ‘sab ni Señor nga walay guwardiya ug walay close circuit television (CCTV) ang maong establisemento.

Gisusi usab karon kun dunay inside job sa hitabo ug daling gihipos sa kapulisan ang mga selpon sa mga empleyado aron pagsubay niini nga anggulo.( Jojo C. Ugdol /EIM)(BANAT NEWS)