20 ka tawo, apil Australyano sikop sa drug raid

CEBU, Philippines - Dul-an 20 ka tawo ang nadakpan sa buwag nga anti-illegal drugs operations nga gilusad sa kapolisan sa Sugbo nga miresulta sa pagkasikop sa usa ka Australyano.

Sa Brgy. Poblacion, Lapu-Lapu City nadakpan ang siyam ka tawo apil ang Australyanong si Paul Cooper uban sa mga suspek nga sila si Jaime Babatuan, Ronnie Villantes, Lito Santos, Jonas Ybañez, Desederio Ortega, Nicanor Adarlo, duha ka babaye nga sila si Rubelyn Labe, ug Geralyn Andrade.

Ang mga dinakpan nagpuyo sa nagkalain-laing dapit sa Metro Cebu sa Cordova, Lapu-Lapu City,  Barili ug dakbayan sa Sugbo.

Matud ni Sr. Insp. Wilbert Parilla, hepe sa Gun-ob Police Station 3, nakadawat sila og impormasyon nga dunay suyopanan sa maong dapit ug dunay magpundo nga mamaligya og drugas sa maong dapit hinungdan sa ilang gihimong operasyon.

Apan wala nila maabti ang drug pusher tungod kay aduna diay CCTV camera nga dunay monitor sa sud sa drug den kini nga gimuntar. Ang pusher wala pangalani tungod sa himuong followup operation. Nakuha sa lugar ang tunga sa sakong drug paraphernalia, dakong timbangan ug duha ka shotgun ug 72 ka gagmay’ng paketeng shabu.

Samtang mokabat sa kapin P130 mil nga kantidad sa shabu ang nasakmit sa managlahing drug raid operation sa kapulisan sa Regional Anti-Illegal Drugs Special Operations Task Group-7 ug Daanbantayan Police Station nga miresulta sa pagkasikop sa tulo ka mga tawo ug sa usa ka 16 anyos niadtong nakalabay nga gabii.

Ang mga sakop sa RAIDSOTG-7 misikop sa usa ka gidudahang level 2 drug pusher nga si Roderick Ruiz diha sa Brgy. Kalumboyan sa lungsod sa Sogod.

Napalitan sa kapolisan og P200 nga shabu ang suspek hinungdan nga kini gisikop. Matud pa ni Sr. Insp. Joel Bicoy ang team leader sa RAIDSOTG-7 daghan silang nadawat nga reklamo batok kang Ruiz.

Atol sa pagronda sa kapulisan miabot sa 56 ka pakete sa shabu ang nakuha sa kapulisan nga mikantidad og P118 mil.

Samtang sa lungsod sa Daanbantayan  nadakpan sa Sitio Camotes, Brgy. Tapilon si Obebfares Coyoca, 32, nagpuyo sa maong lugar ug ang usa ka 16 anyos nga naaktuhang nipalit og shabu kang Coyoca.

Ang operasyon gipangulohan ni Sr. Insp. Roger Quijano nga miresulta usab sa pagkasakmit sa daghang pinaketeng shabu nga mikantidad og P18 mil, usa ka 9mm pistol nga duna’y lima ka bala.

Samtang nadakpan sa kapolisan ang  usa ka Felixberto Cenagculo Baas, 33 anyos, nagpuyo sa Sitio Baha-Baha,  Barangay  Hagnaya nga giingong namaligya og drugas diha sa Sitio Lawis, Brgy Punta, sa San Remigio, nakuha kaniya ang tulo ka paketeng shabu.

Sa laing bahin nadakpan sa Brgy. Ibabao, sa Cordova sila si  Roland Vaño, 33, ug Emilio Ando, 52, pulos nagpuyo sa maong dapit.

Si Senior Police Office 1 Laurencio Wagwag miingon nga si Vaño maoy target sa operasyon ug nakuhaan nila og unom ka gagmay nga paketeng shabu  ug  P200 nga buy-bust money ug P400 nga gituohang halin niini.

Nadakpan usab sa Presinto 2 sa Mandaue City Police Office (MCPO) ang 38 anyos nga welder nga si Vicente Sanchez Getututa sa Brgy. Mantuyong tungod gihapon sa pagpamaligya og drugas. (BANAT NEWS)