P1M shabu nasakmit
CEBU, Philippines – Mokabat sa dul-an usa ka milyon ka pesos nga balor sa gituohang shabu ang nasakmit sa kapulisan sa dakbayan sa Toledo gikan sa upat ka mga lalaki nga giingong tigpayuhot niini diha sa Brgy. Poblacion sa maong dakbayan.
Giila ang mga dinakpan nga sila si Alejandro Marinay ,44, kinsa maoy subject sa gilusad nga buy-bust operation ingon man sila si Alex Cajuelan, 41, Frederico Lapay, 44, ug Orland Joaquilina, 23, pulos nagpuyo sa nahisgutang lugar.
Ang operasyon gipangulohan ni Police Inspector Jovito Labra ang Police Community chief sa Brgy. Don Andres Soriano (Lotupan).
Nasakmit gikan sa mga dinakpan ang lima ka dagkong putos nga gidudahang shabu, usa ka medium size ug 12 ka putos nga gituohang shabu nga tanan gibana-banang moabot og 85 gramos.
Gibana -bana sa kapolisan nga mobalor sa P935 mil ang kantidad sa maong nasakmit nga shabu.
Nakuha usab sa posisyon ni Marinay ang P200 nga marked money nga gigamit sa transaksiyon pagpalit og shabu. – /EIM) (BANAT NEWS)
- Latest
