Namunal og iro, dog food gikaon

CEBU, Philippines – Nagtaki-ang ug nakaangkon og mga bun-og sa lawas ang 25-anyos nga lalaki nga gibalhug sa selda sa Parian Police Station human nakulatahan sa mga istambay sa M.J. Cuenco Avenue, Lorega San Miguel diha’ng nakit-an nga nibunal sa usa ka Siberian husky nga iro pasado alas 10 kagahapon sa buntag.

Ang natanggong sa prisohan mao si Argie Casilac Navida, technician sa Cebu Cable, may kapuyo nga temporaryo nga nagpuyo sa Ward 2, Minglanilla ug lumad nga taga Poblacion, Gabuyan, Davao del Norte.

Matud ni Edwin Dilao, non-uniformed personnel sa Parian Police Station, nga ang tag-iya sa iro nga si Michael Ian Cañete ang wala’y plano nga pasayloon ang suspek sa iya’ng gibuhat.

Sumala pa ni Dilao nga dunay car wash si Cañete diin si Navida ang naabot sa mao’ng lugar kay magpalimpyo sa iya’ng motorsiklo. Asoy sa mga nakakita nga samtang nagpaabot si Navida, kalit kini’ng nikuha sa dumb bell nga gibutang sa kilid ug gi-aswat-aswat.

Pipila ka minutos ang nilabay miadto kini sa kilid sa car cash diin nahimutang ang usa ka halwa nga gibutangan sa iro ug gi-ablihan dayun puspos sa ulo.

Wa pa natagbaw ang suspek gikaon pa niini ang dog food. Tungod sa kakusog sa hapak, nikirig ug nakuyapan ang iro.

Ang mga istambay nga nakakita ang dali sab nga nidakop sa suspek ug gikulata.

Sigun pa ni Dilao nga ang tag-iya sa iro nakaangkon pa og pangos sa bukton human natumba sa iya’ng motorsiklo kay nagdali-dali og pauli sa balay diha’ng gipahibawo sa insidente.

Nagkatindad og P40,000 ang iro nga gituohang bag-o pa lang sa tag-iya.

Sulod sa prisento sa kapolisan nagpangagot sa kasuko ang tag-iya sa iro samtang nagtan-aw sa suspek.

Ang suspek niangkon hinuon sa iya’ng sala apan kini niingon nga duna lang daw naghunghong kaniya nga buhaton ang pagbunal sa iro.

Sigun ni Navida nga naglibog sab siya ngano’ng iya’ng nabuhat ang mao’ng hitabo. Giangkon usab sa suspek nga tiggamitan siya og drugas apan kini nihimakak nga nakagamit siya og shabu niadto’ng higayuna.

“Hasta lagi daw dog food gikaon nako, naglibog gyud ko sir ngano,” dugang sa suspek.

Saysay pa sa suspek nga usa sa hinungdan nga iya’ng nahimo ang pagbunal sa iro sa diha’ng kini giusig ug kalit lang nausab ang dagan sa iya’ng hunahuna.

Kaso’ng paglapas sa Animal Welfare Act ang atubangon sa suspek samtang gidala sab sa wala masayri’ng tambalanan sa mga hayop ang iro. – /GMR) (BANAT NEWS)