Pagbayad ngadto sa ACT gitun-an

CEBU, Philippines - Gitun-an sa kagamhanan sa dakbayan sa Sugbo ang paagi sa pagbayad ngadto sa Asian College of Technology (ACT) sa mga scholars niini nga mokabat sa P135 milyones.

Lakip sa mga pamaagi nga gitan-aw sa City Legal Office ang pagbayad sa kantidad ngadto sa korte.

Plano sab sa siyudad nga mobayad deretso sa ACT apan mopa-ubos og undertaking nga mosaad nga mo-reimburse kun adunay adverse finding ang Commission on Audit nga “illegal” ang pag-disburse sa pundo.

Ikatulo ang agreement tali sa siyudad ug ACT nga mobutang og bond aron mabawi ang pundo sa higayun nga i-disallow sa COA. Matud ni City Attorney Jerone Castillo nga ipresentar niya sa Lunes ang maong plano atol sa tigum sa konseho ug abogado sa ACT.

Dili ihatag sa ACT ang Transcript of Records sa mga nigradwar nga scholars tungod sa utang sa siyudad.

Ang tag-iya sa ACT, Kongresista Rodrigo Abellanosa, nag-atubang og kasong administratiba ug kriminal human nipirma sa memorandum of agreement sa scholarship program niadto’ng konsehal pa siya sa siyudad. (BANAT NEWS)