Nilayat nga priso barangay kagawad diay

CEBU, Philippines – Kaguol maoy nakitang hinungdan kun nganong milayat gikan sa balkonahe ang inmate sa Cebu Provincial Detention and Rehabilitation Center (CPDRC) niadtong Sabado sa hapon.

Nalandig sa tambalanan si Joven Poligrates giingong usa ka barangay kagawad sa Barangay Mercedes, lungsod sa Poro, Isla sa Camotes adunay kasong  pagpanglugos sa usa ka mabdos.

Matud ni Manansala nga miadtong milabay’ng semana pa lang nabalhin diha sa CPDRC si Poligrates ug posibleng na-depress kini.

Sa wala pa mahitabo ang insidente giingong si Poligrates nagduwa pa kini og basketball ug nanghatag og kwarta sa iyang mga kaubang priso.

Niadtong higayona usab ang asawa ni Poligrates miduaw kaniya sa prisohan nianang pagkahapon apan dihang paingon nang mopauli ang asawa niini giingong mihangyo si Poligrates nga mouban sa pagpauli apan gibalibaran kini tungod kay dili  man pwede.

Dihang milakaw na ang asawa misaka kini diha sa viewing deck ug pina-dive nga milayat ngadto sa ubos.

Si Poligrates gibadlong pa unta sa prison guard nga si Rafael Espina, Jr. apan wala kini mamati, bisan sa ilang “Bosyo” nga si Lito Granada mitabang na sa pag-agni kaniya sa pagkanaog apan wala mopatuo.

Giangkon ni  Manansala nga kuwang sila og mga prison guard nga magbantay diha sa quadrangle sa prisohan.

Matud ni Manansala nga tulo lang ang prison guard nga magbantay sa quadrangle nga magpuli-puli og bantay.

Dugang ni Manansala nga pabutangan niya og ali ang viewing deck nga dili makalusot ang tawo aron dili na mausab ang samang insidente.

Sa laing bahin, si Gobernador Hilario Davide III nagkanayon nga dunay plano ang probinsiya sa pag-hire og dugang prison guard ug jail warden tungod kay sa pagkakaron si Manansala officer-in-charge pa lang gihapon sa CPDRC. – /EIM) (BANAT NEWS)