15 ka luna sa Cordova gititulohan

CEBU, Philippines - Naangkon sa 15 ka residente sa lungsod sa Cordova ang titulo sa lote nga gipangapod-apod kagahapon atol sa tigum sa Regional Development Council (RDC).

Si Mayor Adelino Sitoy sa Cordova nagkanayun nga ang Department of Environment and Natural Resources (DENR) ang nitabang sa pagproseso sa mga titulo ug gitabangan sa Asia Foundation. Ang Cordova adunay 1,260 ka luna nga wala’y titulo ug tax declaration lang ang gihuptan sa mga residente.

Niadto pa’ng 2009 nagsugod pagpatitulo ang lokal nga kagamhanan sa mga luna ug hangtud 2010 nikabat na sa 287 ka luna ang natitulohan.

Ang kagamhanan sa Cordova niawhag sa mga wala pa’y titulo nga mo-aplay subay sa mga proseso.

Si Dodge Tumulak, deputized land administrator sa Cordova, nibutyag nga ang 1,000 metro kwadrado paubos mogasto lang og P2,200 sa pagpatitulo kung wala’y problema sa buhis.

Ang tag-iya sa luna mobayad lang og P260 nga application fee sa pagpatitulo. (Brenda D. Batuto/GMR)(BANAT NEWS)