Capa nanamilit sa CCPO
CEBU, Philippines – Nilingkod isip bag-ong officer-in-charge sa Cebu City Police Office si Senior Supt. Marciano Batiancela Jr., nga kasamtangang hepe sa Regional Police Community Relations Division hulip kang Senior Supt. Conrad Capa.
Si Capa nanamilit sa iyang mga sakop atol sa flag raising ceremony kagahapon sa buntag sa hawanan sa Camp Sotero Cabahug nunot sa pagdestino kaniya isip executive officer sa Directorate for Integrated Police Operations (DIPO) sa Visayas.
Mas lapad ang lugar nga iyang alagaran diin lakip na ang Eastern, Central ug Western Visayas apan nagpasalamat si Capa sa bag-o niya’ng posisyon nga maoy iya’ng gilauman nga makab-ot ang pangandoy nga mamahimo’ng one star general.
Si Police Regional Office Director, Chief Supt. Prudencio Bañas, niingon nga Marso 12 pa gikatakda’ng hulipan si Capa apan wala pa niabot ang pormal nga kamandoan.
Sa halos unom ka buwan nga paglingkod ni Capa sa CCPO, milyones nga kantidad sa drugas ang nasakmit human gipagawas niini ang kamandoan sa pagpakigbatok sa mao’ng ilegal nga kalihukan.
Sa pagbiya usab ni Capa isip deputy director for operations sa PRO-7, kasamtangang mohulip kaniya si Chief Supt. Orlando Ualat nga maoy deputy director for administration.
Gawas ni Capa, si Senior Supt. Eduard Carranza sab nga kanhi Chief of Staff sa PRO-7 ang ibalhin sa Kampo Crame isip deputy chief sa Special Action Force (SAF).
Sa biyaan nga pwesto ni Carranza, wala pa’y pangalan nga nigawas nga posible’ng mopuli kaniya. – /GMR) (BANAT NEWS)
- Latest
