RID, CCPO magtinabangay
CEBU, Philippines – Andam motabang ang Regional Intelligence Branch sa Police Regional Office-7 sa kapolisan sa dakbayan sa Sugbo sa problema sa barangay Inayawan.
Matud sa hepe sa RID-7, Sr. Supt. Paul Labra, gimandoan na siya sa deputy director for operations sa PRO-7 ug officer in-charge sa Cebu City Police Office, Sr. Supt. Conrad Capa, nga moabag sa pag-atiman sa barangay.
Ang RID-7 motabang sa paghatag og mga impormasyon sa pag-ila sa mga posible’ng naglihok nga mga badlungon sa maong lugar.
Samtang matud ni Konsehal Dave Tumulak nga nabungkag na ang grupo nga gisundan sa kapolisan sa maong barangay ug kini nitapon na sa silingan nga mga lugar.
Sigun pa sa konsehal nga dunay kauban sa grupo ang nakatug-an kaniya may labot sa mao’ng kalambuan.
Si Tumulak nanawagan sa mga batan-on nga mag-usab na sa ilang mga buhat kay sila karon ang gipangita sa mga polis ug gitagaan og pagtagad.
“Mas maayo og magbinut-an na lang sila kay grabe na ra ba ang kampanya sa mga polis batok nila,” sigun pa ni Tumulak.
Gihugtan sa kapolisan ang pagbantay sa Inayawan human dunay duha ka sakop sa City Intelligence Branch ang naangol sa nahitabo’ng pinusilay tali sa mga sakop sa gang diin usa ka minor de edad ang naangol kinsa gitudlo’ng usa sa mga suspek sa nahitabo’ng mga patay sa lugar. – /GMR) (BANAT NEWS)
- Latest
