Polis gipatay
CEBU, Philippines - Subo ang Valentine’s Day sa asawa sa usa ka polis nga nadestino sa Boljoon Police nga mipadala pa kaniya og greetings pinaagi sa text sa wala pa kini pusila kagahapon sa tungang gabii sa wala pa mailhing mga tawo sa Poblacion Ward 2 sa Minglanilla.
Ang namatay giila nga si Senior Police Officer 4 Rasul Segismar, nagpuyo sa maong barangay apan nadestino sa lungsod sa Boljoon.
Sumala pa ni Police Officer 1 Tahir Radiab, desk officer sa Minglanilla Police Station, luwan si Segismar sa iyang Honda Wave nga motorsiklo gikan pa sa Boljoon.
Apan pag-abot niya sa ngitngit nga bahin duol sa ilang balay kalit kining gipaulanan og bala sa wala pa mailhing mamumuno.
Ang biktima naigo sa nagkadaiyang parte sa iyang lawas ug sa liog ug patay na pag-abot sa Minglanilla District Hospital.
Sumala pa ni Radiab, napulo ka mga basiyo sa 9mm nga bala, usa ka buhing bala niini, ug usa ka deformed slug ang na-rekober diha sa crime scene. Matud pang Radiab nga planado kaayo ang pagpatay kang Segismar.
Sa pagkakaron, wala pay impormasyon ang kapolisan kun unsay motibo sa maong pagpatay, apan gidudahan nga may kalambigitan kini sa iyang trabaho ug personal nga kaaway.
Sa wala pa gipatay ang maong polis gikatahong ni-text pa siya sa iyang kapikas ug mi-greet og “Happy Valentine’s” ug miingon pa kini nga mahal niya hangtud sa kahangtoran ang iyang asawa. (BANAT NEWS)
- Latest
