Magpakasal unta, Swiss nagpusil
CEBU, Philippines - Patay diha-diha ang usa ka Swiss human iyang gium-om ang .45 caliber pistol ug nagpusil sa iyang kaugalingon sulod sa ilang panimalay sa La Citadella Subdivision, Talamban, dakbayan sa Sugbo pasado alas 12 sa niaging udto.
Ang biktima naila nga si Markuz Greeder, taga Switzerland ug temporaryo nga nagpuyo sa maong lugar. Matud ni SPO4 Rey Cuyos, team leader sa homicide section sa Cebu City Police Office, nga kauban sa langyaw sulod sa balay atol sa hitabo ang iyang kapuyo nga 21-anyos nga si Janeza De Lima.
Sumala pa ni Cuyos nga plano unta sa duha nga moadto sa dakbayan sa Naga aron magpakasal ug gipadali pa sa babaye sa pagpa-ilis aron sila makalakaw na.
Samtang nag-ilis ang babaye sa iyang lawak gikatahong nisulod sa ilang computer room ang langyaw ug pipila ka minutos ang nilabay iya na lang nadungog ang lanog nga buto ug nakita nga nagbuy-od na sa sawog ang langyaw nga nagkadugo.
Sigun pa ni Cuyos nga hayan gium-om sa langyaw ang armas kay may samad ang dila niini.
Dali pa unta nga nakaresponde ang mga rescue team sa dakbayan apan wala na’y kinabuhi ang langyaw sa ilang pag-abot.
“Lisud pa kaayo estoryahon ang babaye kay sige pa og hilak, usahay magkalalis daw sila pero wala pa ta kahibalo unsa’y hinungdan,” matud ni Cuyos.
Nakuha sa crime scene ang usa ka .45 caliber pistol, usa ka basiyo sa bala nga gituohang gigamit sa namatay. (BANAT NEWS)
- Latest
