Masbate Gov. gitionan

CEBU, Philippines – Usa ka sakop sa Special Weapons and Tactics sa Cebu City Police Office ang gireklamo sa mga opisyal sa Masbate nga mition kanila og armas atol sa Sinulog Grand Parade niadtong Domingo.

Sila si Masbate Gob. Rozalinda Seachon Lañete, 3rd District Representative Scott Davies Seachon-Lañete, ug PENRO (Provincial Environment and Natural Resources Officer (PENRO) Edgar Alamag De Lara ang mipasaka og reklamo batok ni Senior Police Officer 1 Arthur Sabang.

Si Sabang sakop sa Special Weapons and Tactics (SWAT) nga dali sab nga nangayo og public apology.

Apan ang kampo ni Lañete pursigido g’yud nga mopasaka og kasong kriminal ug administratiba batok sa maong polis.

Ang insidente nahitabo alas 7:20 sa gabii sa Domingo diha sa eskina R. Landon ug Osmeña Boulevard duol sa entrada sa Cebu City Sports Complex diin gihimo ang Sinulog Dance Competition.

Base sa reklamo nga natala sa buhatan sa Fuente Police Station nga ang grupo sa gobernador lakip ang ilang polis escort nga si PO2 Joey Balag-ey nagkuyog  sa contingent sa Tribu Placernon nga paingon mosulod  sa complex.

Matud pa ang gikahimutangan sa grupo naa sa ngitngit nga bahin ug pagkakita kanila ni Sabang giiwagan sila niini sa iyang flashlight nga gitapot sa iyang armas.

Si Gobernor Lañete maoy mipaila nga sila mga opisyal sa Masbate nga kabahin sa contingents ug ang ilang polis escort nga si Balag-ey miingon kang Sabang nga iyang kauban ang mga VIPs (Very Important Person). Apan sumala pa nga wala sila paminawa ni Sabang.

Si De Lara nga kanhi opisyal sa kapulisan sa Masbate miingon nga gipahinumduman pa ni Balag-ey si Sabang nga sayop ang gibuhat niini pag-iwag sa iyang flashlight nga gitapot sa Armalite.

“Minumura niya kami,” matud pang De Lara. Gikatahong giingnan pa sila ni Sabang nga “God d­­­­__ t, hindi kayo taga rito, arestohin ko kayo, identify ka nga?” Lunes na nila gisumbong ang maong insidente sa Fuente Police ug kagahapon mibalik si De Lara sa Fuente Police aron sa pagpasaka sa kaso.

Matud pa ni De Lara nga makapasaylo kini sa maong polis apan gusto niya nga mahatagan kini og leksyon, matud niya ang pagkabanghag kanila ni Sabang bisan mipaila na sila maoy nakapahiubos kanila.

“Our governor had introduced already herself pero minumura ni Sabang,” matud pa ni De Lara.

“The policeman is to serve and protect and how could you protect the people kun ganyan ang attitude niya,” dugang pa ni De Lara.

Hinoon bisan pa man sa maong hitabo si De Lara miingon nga moapil gihapon ang Masbate sa sunod nga Sinulog nga una sila’ng misalmot niadto pa’ng tuig 2009.

Sa public apology ni Sabang kagahapo’ng adlawa kini nangayo  og pasaylo ug miangkon sa iyang kasaypanan samtang naghimo sa iyang trabaho ug misaad nga  iyaha nang usbon ang iyang pamaagi.

“Dili g’yud ‘to nako intensyon nga manion, ngitngit man gud ang lugar mao ‘tong giiwagan nako,” matud pa ni Sabang. Gimando na ni Cebu City Police Office OIC, Senior  Superintendent Conrad Capa nga imbestigahon si Sabang. Matud niya nalakip sa “maximum tolerance” ang pagpaubos sa tingog atubangan sa mga tawo. – /EIM) (BANAT NEWS)