Trisikad driver nalumos

CEBU, Philippines - Nakit-ang patay ug naglutaw sa pantalan sa Poblacion, lungsod sa Ronda ang lawas sa usa ka trisikad driver human  gituohang nalumos niadtong Huwebes sa hapon.

Usa ka mananagat nga si Efren Dioquinio, 45, ang nakadiskubre sa patay’ng lawas nga nailhan nga si Crescencio Faciol, 37, molupyo sa Cansayahon, Ronda.

Matud ni PO1 Nembrod Ogario sa Ronda Police Station nga gikan nag-inom si Faciol nianang sayo sa buntag ug naligo sa dagat dapit sa pantalan.

Alas kwatro sa hapon padulong na unta’ng managat si Dioquinio dihang nakit-an ang naglutaw nga lawas ni Faciol. Dali’ng nitaho sa kapolisan si Dioquinio ug gisuwayan pa sa pag-luwas apan nasuta nga patay na.

Wala’y nakita ang kapolisan nga foul play sa maong insidente. (Janice B. Marsada, USJ-R Masscom intern/GMR)(BANAT NEWS)