2 ka langyaw nagmaoy

CEBU, Philippines -  Duha ka langyaw ang gidakop sa kapolisan dinhi sa dakbayan sa Sugbo tungod kay nakahimo sila og lainlaing salaod samtang sila’ng duha mga hubog.

Ang gidakop mao sila si Lincoln Dominic Ruben, 22, taga Papua New Guinea ug temporaryo nga nagpuyo sa Barangay Sambag 1, ingon man ang usa ka Nigerian national nga si si Ilasanmi Kayode Tosin, 23, nagpuyo usab sa Barangay Sambag 2.

Si Ruben gidakop sa mga tanod kay matud pa nagmaoy sa kahubog ug nanghagis sa usa ka balay pasado alas tres sa miaging kaadlawon didto sa Private Road sakop sa Barangay Sambag 1.

Ang mireklamo batok ni Ruben mao sila si Allan Fernandez ug Lita Bayarcal kay ang taga Papua New Guinea nagmugna og grabe’ng kasaba. Human gidala sa police station si Ruben, gipakuhaan siya og liquor test ug positibo kini sa alcohol substance.

Gibalhog na si Ruben sa Cebu City Police Station-2 ug hayan pasakaan og kaso nga paglapas sa City Ordinance 1929 o drunkenness ug Malicious Mischief. Samtang si Tosin gidakop ‘sab tungod sa reklamo sa usa ka kahera nga gihinol ang iyang sampot ug dughan sa mao nga langyaw didto sa Aznar Road, sakop sa Barangay Sambag 2.

Base sa imbestigasyon sa kapolisan nga kaniadto’ng Biyernes sa hapon ang cashier sa Balamban Liempo kalit lang nga nahaigpot diha nga gihinol sa maong langyaw ang iyang sampot.

Tungod kay gibati sa maong kahera nga nabastos siya sa gihimo ni Tosin sa paghinol sa iyang sampot ug dughan dali siya nga mi-report ngadto sa barangay hall ug gipadakop ang langyaw.

Ang mga tanod abtik kaayo nga miresponde sa maong alarma ug gidala nila ang langyaw aron unta nga husayon sila ug ang kahera apan dihang didto na sulod sa barangay hall si Tosin kalit lang kini nga nag-wild.

Matud pa nga nagmaoy pag-ayo ang Nigerian national ug gisumbag, gipatiran, ug gibaharan pa niini’ng patyon si Konsehal Ryan Aznar nga buot unta mohusay kaniya ug sa kahera. Tungod sa gibuhat sa langyaw nanawag og panabang sa kapolisan ang konsehal.

Wala pa mahuman sa iyang pagmaoy, misukol pa gyud si Tosin ngadto sa kapolisan nga modakop na unta kaniya.

Samtang giposasan na si Tosin ni PO2 Ullyses Reales misukol pa gihapon ang langyaw ug nikisi-kisi mao nga ang polis nakaangkon og mga garas sa paglugnot sa langyaw nga iyang gidakop. (BANAT NEWS)