Negatibo sa paraffin test

CEBU, Philippines – Negatibo sa paraffin test ang pulis nga namatay nga si Police Officer 1 Heide Garcia ug ang tag-iya sa armas nga  si PO1 Cyrelle Marie Bayate nga nadestino sa Pari-an Police Station sa Cebu City Police Office.

Si Senior Superintendent Noli Romana ang hepe sa Cebu City Police Office (CCPO) nga nahinabi sa mga tigbalita miingon nga wa kini magpasabot nga makalingkawas na si Bayate sa imbestigasyon.

Matud pa ni Romana nga dunay mga susamang kaniadto nga nakapabuto og armas apan nag-negatibo sa paraffin test.

Base sa nakuha nga impormasyon sa Banat News gikan sa usa ka forensic expert kinsa nagdumili sa paghingalan, dunay mga hinungdan nganong wa mopilit ang gunpowder residue (GPR) sa mga kamot sa nagpabuto og pusil. Ang GPR mahimong mapalid palayo sa mga kamot kun dunay nag-atubang nga nag-andar nga electric fan o aircon.

Si Romana mimando pagpahigayon og reenactment sa crime scene ug pagpangita og dugang ebidensiya sa kaso.

“I promised the family kasi, that justice will be served. In the interest of justice and para sa peace of mind nating lahat,” matud pa ni Romana. Matud pa ni Romana nga hangtod karon nagpadayon pa ang ilang imbestigasyon aron matino kung tinuoray ba nga nagpakamatay, aksidenteng napusilan  o ba kaha tuyo nga gipatay si PO1 Garcia.

“Actually hindi pa naman natin sinasabi kung ano talaga, under investigation pa to lahat,” sigun pa ni Romana. Magpabilin pa sa kostudiya sa kapulisan si Bayate. Ang bana sa namatay nga pulis nga si PO1 Roy Garcia nagplano na ‘sab pagdangop sa National Bureau of Investigation (NBI)-7 aron magpatabang sa imbestigasyon.

Apan si Romana mitug-an nga iya na nga naestorya ang nabiyudong polis  ug napasabot nga dili sila mohunong hangtud dili mahuman ang imbestigasyon.

Si Dr. Benjamin Lara sa Regional Crime Laboratory nga nahinabi sa mga tigbalita mitug-an nga basi sa resulta sa gihimo nga examination sa lawas sa namatay nga policewoman, usa ra ka bala ang nakaigo sa iyang dughan nga milapos sa iyang likod ug maayong pagkaigo sa kasingkasing apil na sa baga niini.

Nakita ‘sab ni Lara nga dul-it ang pagpusil sa armas sa wala nga bahin sa dughan ni Garcia. Wala say nakita nga bun-og sa lawas sa namatay nga pulis. – /EIM) (BANAT NEWS)