P2.3M shabu nasakmit

CEBU, Philippines- Mokabat sa P2.3 milyones nga kantidad sa drugas ang nasakmit sa Provincial Intelligence Branch (PIB) sa Cebu Provincial Police Office, gikan sa tulo ka mga level 2 drug pushers  nga mibaligya og drugas sa mga sakop sa kapulisan sa gawas nga bahin sa usa ka mall sa Tabunok, dakbayan sa Talisay.

Ang mga nasikop mao sila si Paquito Hisola, 33, taga lungsod sa Samboan  ug ang mag live-in partner nga Diane Ortega, 27, ug Redomar Tiana, 42, nga taga Mohon,Talisay.

Si Senior Inspector Armando Labora maoy nangulo sa maong operasyon human sa usa ka adlaw nila nga surveillance sa mga suspek base sa impormasyong  ilang nadawat.

Matud pa mi-order ang kapulisan og 100 gramos nga shabu apan si Hisola excited pa kaayong mipahibalo nga duna kini available nga 200 gramos nga stock niini hinungdan nga gisakyan kini sa kapulisan sa kantidad nga P400,000.

Nagkasabot sila nga sa gawas sa maong mall sila magkita ug tuod man, miabot ang mag live-in partners nga nagdala sa druga nga gisulod og paper bag ug human gitunol ang drugas diretso silang gidakop.

Nakuha ang dagko nga putos sa drugas nga susama og putos sa ice candy nga nagkantidad og P2.3 milyon.

Sa interogasyon sa kapulisan sa duha, sila mitug-an nga sa Talisay City sila magkuhaan og supply sa drugas

Samtang ang City Intelligence Branch sa Cebu City Police Office ang misikop sab sa duha ka lalaki ug usa ka babaye,atol sa ilang gihimo nga buy-bust operation didto sa Villagonzalo II, Tejero ning dakbayan sa sugbo.

Ang mga nasikop naila nga sila si Jeffrey Villomo, 23, nga maoy target sa kapulisan nga nakuhaan og usa ka gamay nga pakete ug usa ka dako nga putos sa gituhoang drugas, Albert Montesclaros, 41, nga nakuhaan og .357 revolver nga dunay upat ka bala, ug Sandra Mae Montesclaros, 27, nga nakuhaa’g drug paraphernalia. Ang deputy chief sa CIB nga si Insp. Gomersendo Mandawe mibutyag nga P72,200 ang kantidad sa drugas nga ilang nasakmit.

Samtang ang mga sakop sa IDMB o Investigation Detection and Management Branch sa CCPO ang misikop sab sa usa ka Jomar Villas, 31, didto sa Sitio Avocado, Lahug human nakuhaan og usa ka medium size nga drugas ug drug parapernalia.

Gitanggong na sa Cebu City Police Office detention cell ang upat ka mga dinakpan nga mag- atubang og tukmang kaso. Sa laing bahin, duha ka lalaki ang nasikop human makuhai og pipila ka gagmay’ng paketeng shabu ug usa ka .357 rebolber nga dunay bala atol sa buy-bust operation sa Sitio Pagutlan, Tayud, lungsod sa Liloan.

Si Joe Marie Yap Jayag  ug Regie “Intsik” Lagahit Robinson nadakpan human  mobaligya og shabu ngadto sa mga polis. Duha ka gamay’ng pakete ug usa ka medium pack nga may sud nga gituohang shabu ug P300 nga gituohang halin ang nasakmit. (BANAT NEWS)