Pagkawat sa P1.54M sa tindahan “inside job”

CEBU, Philippines - Ang anggulo sa inside job maoy usa sa gisubay sa mga imbestigador sa nahitabong pagpanglungkab sa U-Well  Marketing nga nahimutang sa Barangay Mantuyong, Dakbayan sa Mandaue nga nawad-an og salapi ug mga alahas nga mokabat sa P1.54 milyones.

Si SPO3 Marcos Noval Jr., imbestigador sa Mandaue City Police Office (MCPO) miingon nga natahap sila nga posibleng dunay sakop sa maong tindahan nga nalambigit sa maong paglungkab. 

Usa sa nakapaduda kanila mao nga wa maglisod ang kawatan paglungkab sa steel cabinet base sa nakitang kadaot niini.

Diha sa sud niini nahimutang ang cash ug mga alahas.

Dugang pa ni Noval nga bisan ang atop nga giagian sa pagsulod sa kawatan namatikdan nga gamay lamang kaayo ang nakanlat. 

Gawas pa niini, nasuta nga atol sa maong hitabo adunay natulog sa tapad niining lawak apan nahibulong ang mga polis kun nganong wala kini makamata sa kinagulkol sa atop ug steel cabinet.

Ang kapolisan padayon pang mipalawom sa imbestigasyon sa maong hitabo. (BANAT NEWS)