Nagbugno, usa ang patay
CEBU, Philippines – Patay ang usa ka babaye nga gidunggab sa iyang silingan dihang naglalis sila kagahapon sa buntag sa barangay Cogon-Pardo sa dakbayan sa Sugbo.
Ang biktima naila nga si Maria Catherine Gabilan, 47, giingong nadunggaban ni Gimepearl Bernal, 34, nga silingan og kwarto sa biktima.
Si PO1 John Erick Samosa nga nahinabi sa Banat News miingon nga ang suspek ug ang biktima naglalis sayo sa buntag nga miresulta sa panagbugno sa duha.
Matud pa sa suspetsado nga nahinabi sa Banat News nga nagsugod ang ilang panaglalis dihang napiskan sa biktima sa iyang hinugas ang gilung-ag sa suspek.
Base sa alegasyon sa suspek, giyabo sa biktima ang iyang gilung-ag ug gisabliga’g nagbaga nga uling ang iyang anak mao nga gidepensahan niya ang iyang mga anak.
Midugang kini nga misulod siya sa ilang kwarto ug nakakuha og gunting ug kutsilyo apan samtang diha siya sa sud matud pa niya gibunlot siya sa bana sa biktima paggawas hinungdan sa pagkahay-ad niya.
Ug sa iyang kahadlok kay gitabangan na siya sa duha nagsige na lang siya og wara-wara sa kutsilyo ug gunting aron walay makaduol kaniya samtang naghayang siya sa yuta. Apan wala niya damha nga nadunggaban niya ang biktima sa pipila ka higayon sa lawas ug mga kamot niini.
Patay na pag-abot sa Cebu City Medical Center si Gabilan. Si Bernal gitanggong na karon sa Cebu City Police Office alang sa pagpasaka og kaso. - /EIM) (BANAT NEWS)
- Latest
