Gold mining gipahunong sa DENR-7
CEBU, Philippines - Gipahunong sa Department of Environment and Natural Resources ang operasyon sa usa ka gold mine sa San Francisco, Santa Catalina, Negros Oriental.
Kini ang gipahibawo sa kadagkoan sa Mines and Geosciences Bureau sa DENR-7 human giluwatan ang cease and desist order (CDO) kagahapon batok sa kompaniya nga giingong ilegal ang gihimong gold mining and processing operations.
Sumala pa ni MGB-7 Regional Director Loreto B. Alburo nga si Santa Catalina Mayor Nathaniel Electona mismo ang nagpatuman sa ilang closure order sa operasyon sa dili mo-minus 12 ka mga ball o rod mills nga maoy gigamit sa pagpanguha og gold materials sa naasoy nga lugar.
Matud ni Alburo nga niadto pang buwan sa Abril ug Mayo gihangyo sa MGB-7 si Electona nga ipasira ang nahisgutang gold mining and processing operations. Kini tungod kay nakahatag kini og hulga sa kinabuhi sa mga tawo nga nagpuyo duol sa lugar ilabi na sa mga minero.
Giingong wala pa usab makakuha sa mga gikinahanglang mining permits ang kompaniya.
Aron pagseguro nga mapatuman gyud ang closure order ug pag-guba sa mga ekipo sa naasoy nga gold mining and processing operations, si Alburo miingon nga ilang giawhag ang Armed Forces of the Philippines (AFP) ug ang Philippine National Police (PNP) sa maong lugar sa pagkuyog ni Electona.
Nasayran sa imbestigasyon sa MGB-7 nga ang maong minahan nigamit og mercury sa pagkuha sa mga gold ngadto sa 500 ka ektaryang luna sa may sitio Damuyog, Kabuyonan ug Bancolino sa barangay San Francisco, Sta. Catalina nga kalapasan sa Executive Order No. 79. (BANAT NEWS)
- Latest
