Taga HPG-7 gikiha

CEBU, Philippines - Nag-atubang og kasong carnapping sa piskaliya ang usa ka confidential agent ug kanhi custodian sa Highway Patrol Group (HPG)-7 human giingong namaligya og kinawat nga sakyanan.

Kauban ang ahente sa National Bureau of Investigation (NBI)-7, usa ka Reynaldo Olmeda Tan ang nisang-at sa kaso batok nilang Mario Real Saycon ug SPO4 Edwin Galan.

Si Tan, usa ka businessman nga nag-base sa Iligan City, nagkanayon nga niadtong Hunyo ang iyang Toyota Revo gisakmit sa HPG-Iligan City human giingong carnapped vehicle.

Basi sa records sa HPG-Iligan, ang maong sakyanan gikawat niadtong 2002 sa Quezon City.

Matud ni Tan nga napalit niya ang sakyanan niining tuiga pinaagi sa on-line shopping site gikan kang Saycon kinsa nagpaila nga usa ka confidential agent sa HPG.

Human nagbilin og contact details ug mode of payments sa site si Saycon, iyang gi-close ang deal.

Tungod kay konektado si Saycon sa HPG, wala na nagsusi si Tan sa maong sakyanan ug human nabayri ang sakyanan sa kantidad nga P260,000, ang Toyota Revo iya kining nakuha dayun. Apan matud niya nga pagkuha niya og clearance sa HPG-Iligan niadtong Hunyo, giingnan siya nga ang napalit niya nga sakyanan usa ka carnapped vehicle.

Si Galan, matud ni Tan naapil sa kiha human gitumbok ni Saycon nga maoy duolon kung may problema siya sa papeles.

Nasayran nga si Galan apil usab sa mga gikihang opisyal sa HPG-7 may kalambigitan sa kasong pagbanhig-patay kang Atty. Noel Archival ug kauban.  (BANAT NEWS)