Spo1 Dumpit hukman na

CEBU, Philippines- Mahibaw-an ang kapalaran sa kontrobersyal nga polis nga si SPO1 Adonis Dumpit ugmang adlawa sa himuong promulgation kalabot sa murder case nga iyang giatubang may kalambigitan sa kamatayon sa giingon gidudahang tulisan diha  sa Sitio Sampaguita, Villagonzalo II, Barangay Tejero nga basahon  diha sa Regional Trial Court.

Si Dumpit natanggong karon sa Cebu City Jail tungod sa kasong murder   sa pagpatay ni Ronron Go niadtong Disyembre 14, 2004 sa hapon.

Sa eksklusibong pakighinabi sa The Freeman-Banat News sa inahan ni Go  nga si Janeth Badana, mitug-an kini nga siya ug iyang pamilya gikuyawan usab nga nagpaabot kung unsa'y desisyon sa korte karong umaabot Martes sa buntag diha sa sala ni Judge Ester Veloso sa Branch 6.

Gitug-an ni Badana nga ilang giandam ang ilang kaugalingon "mental, physical ug emotional" kung unsa'y hukom sa korte, dugang dason nga kung dili nila makuha ang hustisya ila nalang itugyan ang tanan sa Ginoo.

"Ang akong gipangayo sa Ginoo nga hatagan ko niya og strength to accept whatever decision of the court," matud pa ni Badana. Dugang pa ni Badana nga nagsige siya og hilak human iyang nadawat ang notice sa promulgation.

"Dili ko ganahan mo-preempt sa desisyon pero kung unsa'y ma-desisyonan sa korte kinahanglan natong dawaton bisan sakit," dugang dason ni Badana kinsa pabiling miinsister nga inosente ang iyang anak sa pasangil batok niini.

Kahinumduman, mi-insister si Dumpit nga ang iyang gibuhat igo lang nga "self-defense."

Si Dumpit ug duha niya ka kaubang polis, Police Officers 3 Ruel Hortellano ug Porferio Gabuya mihimo og follow-up operation sa balita nga dunay nahitabong pagpanulis sa usa ka jeep pasaheroan human usa ka ginang ang midangop sa ila ug nangayo og panabang kay nabiktima ang iyang anak sa usa ka tulis.  Si Ronron Go, kinsa  silingan ni Dumpit diha sa Tejero gitudlo sa usa sa mga biktima sa pagpanulis.  Si Dumpit uban Hortellano ug Gabuya dali dayong miadto sa panimalay ni Go diha sa Villagonzalo II.  Matud pa nga si Go misuway og likay gikan ni Dumpit apan ang maong polis mipusil sa suspetsado sa likod. Base sa autopsy report sa National Bureau of Investigation,  si Go naigo sa luyong bahin sa iyang lawas makaduha ka higayon hinungdan sa iyang kamatayon. - /EIM) (BANAT NEWS)