Naguroy sa baka patay

CEBU, Philippines- Patay nang napalgan kagahapon sa buntag sa iyang anak ug mga paryente ang usa ka 79-anyos nga lalaki kinsa gituohang naguroy sa ilang baka nga iyang gitugway sa kalibonan sa Barangay Maghaway, dakbayan sa Talisay.

Ang namatay giila nga si Mariano Labajo, residente sa Barangay Jaclupan, dakbayan sa Talisay apan dunay payag-payag diha sa Maghaway diin niya pasabsabon ang iyang binuhing baka.

Sila si SPO1 Yvonne Illustrisimo, PO2 Jude Enemecio ug PO1 Stephen Sefuesca ang miresponde sa insidente.

Si Sefuesca nga nahinabi sa Banat News kagahapon nagkanayon nga si Labajo kada adlaw moanha gyud kini sa iyang payag aron magtugway ug maglawog sa baka. Kataposan siyang nakit-an alas 4:30 sa hapon niadtong Sabado diha sa iyang payag. Apan kagahapon sa buntag ang anak ni Mariano nga si Justin, 19,  dunay nakapahibalo kanila nga dunay tawo nga nag-ubo diha sa may payag sa iyang amahan.

Daling gisusi ni Justin ug sa ilang mga paryente ang lugar ug nakita nila ang wala nay kinabuhi nga si Labajo kinsa dunay mga pangos sa lawas, nawong ug ang agtang niini gituohang napantok sa bato.

Matud ni Sefuesca nga dako ang ilang pagduda nga giguroy kini sa baka tungod sa pangidaron niya ug hinay na kaayong molihok. Sumala pa nga idlas ug mosuki ang iyang baka. Gituohan usab nga ang biktima niadto pa kining Biyernes naguroy sa baka ug namatay.  - /EIM) (BANAT NEWS)