Dugay na diay nga pusher

CEBU, Philippines - Tulo ka tuig na diay nga nalambigit sa pagpamaligya og drugas ang 15-anyos nga bata’ng babaye nga nasikop sa mga sakop sa City Intelligence Branch (CIB) kaniadto’ng miagi’ng Martes.

Kini ang gibutyag ni Inspector Arieza Otida, hepe sa Women’s and Children Protection Desk (WCPD) sa CCPO. Matud ni Otida nga dako og higayon nga mapasakaan gayud og kaso ang maong dalagita kay nasayod gayud kini nga ilegal ang iyang gihimo.

Lakip sa gitun-an karon nga pasakaan og kaso mao ang inahan sa 15 anyos, apan ila pa nga timbang-timbangon ang kahimtang sa pamilya, ilabina nga bag-o pa kuno kini nga nanganak. Apan ang kauban sa 15-anyos nga 13-anyos, itugyan kini sa kapolisan ngadto sa DSWD tungod sa iyang pangedaron.

Sumala ni Otida nga usa karon sa gitutokan sa kapolisan ang paagi sa mga drug pusher nga mogamit sa mga bata sa pagpayuhot og drugas kay nasayod ang mga pushers nga dili ra kini mabilanggo kun sila madakpan sa kapolisan.

Usa ‘sab sa gitan-aw karon sa kapolisan kun kinsa pa ang ubang mga bata nga naapil sa maong kalihokan aron ‘sab maundang na ang ilang gibuhat.

Sa  maong kalamboan, plano karon sa WCPD nga mohimo og mga lectures, seminar sa mga tunghaang publiko sa dakbayan sa Sugbo, aron ila nga mapasabot sa mga bata ang ilang katungod ug mapahibalo ‘sab sa posibleng ilang padulngan kun mohimo sa maong ilegal nga kalihokan.  -/RUB (BANAT NEWS)